ਭਾਵੇਂ  ਦੁੱਖ ਦੇਵੇਂ, ਭਾਵੇਂ ਸੁਖ ਦੇਵੇਂ
ਤੇਰੀ ਹਰ ਦਾਤ ਮੈਨੂੰ ਮਨਜੂਰ ਸਾਹਿਬਾ
ਲੇਖਾ ਕਰਕੇ ਆਇਆ ਮੈਂ ਜੱਗ ‘ਤੇ
ਤੇਰੀ ਸੋਹਣੀ ਕਾਇਨਾਤ,
ਮੈਨੂੰ ਮਨਜੂਰ ਸਾਹਿਬਾ

ਫ਼ਸ ਕਰਮ ਕਾਂਡ ਵਿੱਚ, ਤੂੰ ਕਿਸ ਨੂੰ ਖੋਜਦਾ ਹੈਂ?
ਤੀਰਥ ਨਹਾਉਣ ਦੇ ਲਈ ਕਿੱਧਰ ਦੌੜਦਾ ਹੈਂ?
ਉਹ ਵਸਦਾ ਤੇਰੇ ਅੰਦਰ
ਚਾਰੇ ਪਾਸੇ ਤੂੰ ਹੀ ਤੂੰ, ਹਰਨੂਰ ਸਾਹਿਬਾ
ਤੇਰੀ ਹਰ ਦਾਤ ਮੈਨੂੰ ..........

ਝੋਲੀਆਂ ਵਿੱਚ ਪਾਉਂਦਾ ਹੈਂ, ਖੁਸ਼ੀ ਦੀ ਦਾਤ ਤੂੰ
ਬਿਠਾਇਆ ਗੋਦ ਵਿੱਚ, ਨਾ ਵੇਖਿਆ ਮੇਰੀ ਜ਼ਾਤ ਨੂੰ
ਪ੍ਰੇਮ, ਮੁਹੱਬਤ, ਪਿਆਰ ਨਾਲ ਤੂੰ ਭਰਪੂਰ ਸਾਹਿਬਾ
ਤੇਰੀ ਹਰ ਦਾਤ ਮੈਨੂੰ........

ਹਰ ਕੋਈ, ਪੁੱਛੇ ਤੇਰਾ ਵਾਸਾ
ਨਹੀਂ ਤੂੰ ਕਿਸੇ ਨੂੰ ਵੀ ਦਿਸਦਾ
ਤੂੰ ਤੇ ਹਰ ਜ਼ਰ੍ਹੇ-ਜ਼ਰ੍ਹੇ ਵਿੱਚ ਹੈਂ ਵਸਦਾ
ਨਹੀਂ ਹੈ, ਕੋਈ ਪਰਦਾ, ਤੂੰ ਹਾਜਰਾ ਹਜ਼ੂਰ ਹੈ ਸਾਹਿਬਾ
ਤੇਰੀ ਹਰ ਦਾਤ ਮੈਨੂੰ.........

ਭੁੱਲ ਜਾਂਦੇ ਨੇ ਲੈ ਕੇ ਸੁਖ ਸਾਰੇ
ਹਰ ਪਲ ਰੋਣ, ਸ਼ਕਾਇਤਾਂ ਮਾਰੇ
ਤੂੰ ਕਿਉਂ ਨਹੀਂ ਇਹ ਦਿੱਤਾ?
ਤੂੰ ਕਿਉਂ ਇੰਜ ਕੀਤਾ??
ਤੇਰੀ ਹਰ ਦਾਤ ਮੈਨੂੰ.........

ਅੱਜ ਭਵ-ਸਾਗਰ ਵਿੱਚ ਡੋਲਦੀ ਮੇਰੀ ਨੈਂਅ ਹੈ
ਪੱਤਝੜ ਦੇ ਰੁੱਖ ਵਾਂਗ, ਨਾਂ ਕੋਈ ਮੇਰੀ ਛਾਂ ਹੈ
'ਅਸਕ' ਮੇਰੇ ਹੀ ਕਰਮਾਂ, ਕੋਈ ਕਸੂਰ ਹੈ ਸਾਹਿਬਾ
ਤੇਰੀ ਹਰ ਦਾਤ ਮੈਨੂੰ ਮਨਜੂਰ ਹੈ ਸਾਹਿਬਾ....।।

ਅਜੀਤ ਸਤਨਾਮ ਕੌਰ
10, 7 , 2019