ਮੰਨ ਲੈ ਜਿੰਦੇ ਮੇਰੀਏ
ਹੁਣ ਮੰਨ ਲੈ ਜਿੰਦੇ ਮੇਰੀਏ
ਕੁਝ ਬਕਾਇਆ ਸੀ, ਤੇਰਾ ਉਸ ਦਾ
ਜੋ ਤੂੰ ਇਸ ਜੱਗ ‘ਤੇ ਆਣਾ ਸੀ
ਮੰਨ ਲੈ ਰੱਬ ਹੀ ਭਾਣਾ ਸੀ

ਨਾ ਰੋ ਇਸ ਜੁਆਕ ਨੂੰ
ਨਾ ਰੋ ਉਸ ਜਵਾਨ ਨੂੰ
ਇੰਨਾ ਹੀ ਉਸ ਦਾ ਚੋਗਾ ਸੀ
ਇੰਨਾ ਹੀ ਉਸ ਨੇ ਖਾਣਾ ਸੀ
ਬੱਸ ਮੰਨ ਲੈ ਰੱਬ ਭਾਣਾ ਸੀ

ਬਹੁਤ ਜਤਾਇਆ ਪਿਆਰ ਉਸ ਨੂੰ
ਕਦੇ ਨਾ ਕੀਤਾ ਇਨਕਾਰ ਉਸ ਨੂੰ
ਤੂੰ ਰੋਕ ਕਿਵੇਂ ਸਕਦਾ ਸੀ ਉਸ ਨੂੰ
ਮੁੱਕਿਆ ਲੇਖਾ ਖਤਮ ਕਹਾਣੀ
ਉਸ ਨੇ ਤੇ ਅੱਜ ਜਾਣਾ ਸੀ
ਮੰਨ ਲੈ ਰੱਬ ਦਾ ਭਾਣਾ ਸੀ

ਕਿਉਂ ਜੱਫਾ ਪਾਇਆ ਧਨ ਨੂੰ?
ਕਿਉਂ ਭਟਕਾਉਂਦਾ ਆਪਣੇ ਮਨ ਨੂੰ??
ਸੁੱਟ ਲਾਹ ਦੇਣਾ ਤੂੰ ਵੀ ਇੱਕ ਦਿਨ
ਆਹ ਤਨ ਤਾਂ ਇੱਕ ਬਾਣਾ ਸੀ
ਮੰਨ ਲੈ ਰੱਬ ਦਾ ਭਾਣਾ ਸੀ....
19.7.2013