ਅੱਜ ਬਣ ਗਿਆ ਮੇਰੀ ਜਾਂ ਪਿਆਰਿਆ


ਪਹਿਲਾਂ ਤੇ ਤੂੰ ਮੇਰਾ ਸਿੱਖ ਸੀ
ਛਕ ਅੰਮ੍ਰਿਤ
ਬਣ ਗਿਆ ਮੇਰੀ ਜਾਂ’ ਪਿਆਰਿਆ
ਇਹ ਕੜਾ ਨਹੀਂ ਬਾਂਹ ਤੇਰੀ ਵਿੱਚ
ਇਹ ਖ਼ਾਲਸੇ ਦੀ ਹੈ ਕੜੀ
ਅੱਜ ਫੜ ਲਈ
ਮੈਂ ਤੇਰੀ ਬਾਂਹ ਪਿਆਰਿਆ
ਪਹਿਲਾਂ ਤੇ ਤੂੰ ਮੇਰਾ ਸਿੱਖ ਸੀ
ਹੁਣ ਬਣ ਗਿਆ ਮੇਰੀ ਜਾਂ’ ਪਿਆਰਿਆ.......

ਉਡੀਕਦਾ ਰਿਹਾ ਮੈਂ ਤੈਨੂੰ
ਕਦੇ ਤੇ ਮੁੱਲ ਪਾਏਂਗਾ
ਮੇਰੇ ਸਰਬੰਸ ਦਾਨ ਦਾ
ਛੱਡ ਮਨਮਤੀਆਂ
ਕਦੇ ਤੇ, ਗੁਰਮਤਿ ਲਈ ਕਰੇਂਗਾ ਹਾਂ ਪਿਆਰਿਆ
ਪਹਿਲਾਂ ਤੇ ਤੂੰ ..........

ਸਿੱਖੀ ਦੀ ਨੀਂਹ ਧਰੀ ਏ
ਕੁਰਬਾਨੀਆਂ ‘ਤੇ
ਸਿਦਕ ਦਾ ਨਾਂ ਹੈ ਸਿੱਖੀ
ਪਵੇ ਲੋੜ ਧਰਮ ਨੂੰ
ਜੇ ਤੇਰੇ ਸਿਰ ਦੀ
ਆਪਣੇ ਮੂੰਹੋਂ ਨਾ ਕਰੀਂ
ਕਦੇ ਨਾਂਹ ਪਿਆਰਿਆ
ਪਹਿਲਾਂ ਤੇ ਤੂੰ ...........

ਭੁੱਲ ਨਾ ਜਾਵੀਂ ਸਿਰਫ਼ ਸਾਹਾਂ
ਤਿੱਕ ਹੈ ਸਫ਼ਰ ਤੇਰਾ
ਆਣਾ ਤੇਰਾ ਰੂਹ ਨੇ
ਆਖ਼ਿਰ ਹੋਂਦ ਵਿੱਚ ਮੇਰੀ
ਇਸ ਦੁਨੀਆ ‘ਤੇ ਤੂੰ ਹੈ
ਇੱਕ ਮਹਿਮਾਂ ਪਿਆਰਿਆ
ਪਹਿਲਾਂ ਤੇ ਤੂੰ ...........

ਪੰਜੇ ਚੋਰਾਂ ਤੋਂ ਬਚਾ ਕੇ
ਰੱਖੀਂ ਲੜ ਆਪਣਾ
ਜਹਾਨ ‘ਤੇ ਬਣ ਜਾਏਂਗਾ ਸੰਤ ਸਿਪਾਹੀ
ਦਰਗਾਹ ਵਿੱਚ ਵੀ ਹੋ ਜਾਏਂਗਾ
ਪ੍ਰਵਾਂ’ ਪਿਆਰਿਆ
ਪਹਿਲਾਂ ਹੀ ਤੇ ਤੂੰ..........

ਮਜ਼ਲੂਮਾਂ, ਮਜਬੂਰਾਂ ਵਿੱਚ ਵਸਦਾ ਹਾਂ ਮੈਂ
ਕਦੇ ਨਾ ਖੋਹੀਂ ਹੱਕ ਕਿਸੇ ਦਾ
ਸਿਰ ਰੱਖੀਂ ਆਪਣਾ
ਮੰਨ ਸਦਾ ਰੱਖੀ ਠਾਂਹ ਪਿਆਰਿਆ
ਪਹਿਲਾਂ ਤੇ ਤੂੰ ...........

ਕਰੀਂ ਸਤਿਕਾਰ ਤੇ ਪਿਆਰ ਮਾਈ-ਬਾਪ ਦਾ
ਜਦੇ ਸੱਜਿਆ ਤੂੰ ਖਾਲਸਾ
ਗੁਰੂ ਗੋਬਿੰਦ ਸਿੰਘ ਹੈ
ਪਿਤਾ ਤੇਰਾ
ਮਾਤਾ ਸਾਹਿਬ ਕੌਰ ਤੇਰੀ ਮਾਂ ਪਿਆਰਿਆ
ਪਹਿਲਾਂ ਤੇ ਤੂੰ ............

ਜੰਮ-ਜੰਮ ਜਾਵੀਂ ਤੇ
ਨਿਵ-ਨਿਵ ਟੇਕੀ ਮੱਥਾ
ਓਸ ਧਰਤੀ ਨੂੰ
ਜਿੱਥੇ ਜੰਮਿਆਂ ਖ਼ਾਲਸਾ
ਆਨੰਦਪੁਰ ਸਾਹਿਬ ਹੈ
ਉਹ ਥਾਂ ਪਿਆਰਿਆ
ਪਹਿਲਾਂ ਤੇ ਤੂੰ.............

ਚਾਰੇ ਪੁੱਤਰ ਵਾਰੇ, ਵਾਰੀ ਮਾਂ ਤੇ ਬਾਪ ਵਾਰਿਆ
ਖ਼ਾਲਸੇ ‘ਤੇ ਹੋ ਗਿਆ,
ਕੁਰਬਾਨ ਮੈਂ
ਸਰਬੰਸ ਦਾਨੀ ਅੱਜ ਪੁਕਾਰੇ
ਮੈਨੂੰ ਜਹਾਂ’ ਪਿਆਰਿਆ
ਪਹਿਲਾਂ ਤੇ ਤੂੰ..............

ਅਕਾਲ ਪੁਰਖ ਦਾ ਭਾਣਾ
ਮੰਨੀ ਮਨ ਕਰਕੇ
ਪੜ੍ਹ ਬਾਣੀ, ਵਾਹਿਗੁਰੂ-ਵਾਹਿਗੁਰੂ
ਜਪ ਆਪਣੀ ਜ਼ੁਬਾਂ’ ਪਿਆਰਿਆ
ਪਹਿਲਾਂ ਤੇ ਤੂੰ.............

ਖ਼ਾਲਸੇ ਵਿੱਚ ਵੀ ਮੈਂ ਸਦਾ ਵੇਖਿਆ ਆਪਣਾ ਰੂਪ
ਬਾਣੀ ਬਾਣੇ ਦਾ ਕਰ ਸਤਿਕਾਰ
ਫਿਰ ਭਵ ਸਾਗਰ ਤੋਂ
ਪਾਰ ਲਾ ਦੇਣੀ
ਮੈਂ ਤੇਰੀ ਨਾਂਵ ਪਿਆਰਿਆ
ਪਹਿਲਾਂ ਤੇ ਤੂੰ ਹੁਣ ਬਣ ਗਿਆ ਮੇਰੀ ਜਾਂ ਪਿਆਰਿਆ
ਆਹ ਕੜਾ ਨਹੀਂ ਬਾਂਹ ਤੇਰੀ ਵਿੱਚ
ਅੱਜ ਫੜ ਲਈ ਤੇਰੀ ਬਾਂਹ ਪਿਆਰਿਆ....।।

ਅਜੀਤ ਸਤਨਾਮ ਕੌਰ
26.12.2013