ਮਿਟਾਈ ਉਸ ਨੇ ਆਪਣੀ ਭੁੱਖ  ਹਵਸ ਦੀ
ਪਰ ਕਿਉਂ ਫੇਰ?
ਦਰ ਬੰਦ ਹੋ ਗਏ ਮੇਰੇ ਲਈ??
ਅਪਣਾਇਆ ਫੇਰ ਮੈਨੂੰ
ਕਿਸੇ ਨੇ ਨਹੀਂ,
ਜੁਰਮ ਕੀਤਾ ਓਸ ਨੇ ਫੇਰ ਮੇਰਾ ਦੋਸ਼ ਕਿਉਂ ਹੈ?

ਹਰ ਰਿਸ਼ਤਾ ਸਿਰਫ ਅੱਖਰਾਂ ਵਿੱਚ ਹੀ ਸਫ਼ੈਦਪੋਅ ਕਿਉਂ ਹੈ?
ਜ਼ੁਰਮ ਕੀਤਾ ਓਸ ਨੇ ਫੇਰ ਮੇਰਾ ਦੋਸ਼ ਕਿਉਂ ਹੈ?

ਰਿਸ਼ਤੇ ਟੁੱਟ ਗਏ ਮੇਰਿਆਂ ਦੇ ਮੇਰੇ ਲਈ
ਆਜ਼ਾਦ ਓਹ ਅਗਲੇ ਸ਼ਿਕਾਰ ਲਈ
ਮੇਰੇ ਲਈ ਤੇਰੇ ਮਨ ਵਿੱਚ ਰੰਜਿਸ਼ ਕਿਉਂ ਹੈ?
ਜੁਰਮ ਕੀਤਾ ਓਸ ਨੇ ਫੇਰ ਮੇਰਾ ਦੋਸ਼ ਕਿਉਂ ਹੈ?

ਕੀ ਓਸ ਦੇ ਘਰ ਔਰਤ ਨਾਮ ਦਾ ਕੋਈ ਰਿਸ਼ਤਾ ਨਹੀਂ?
ਵਾਪਰ ਸਕਦਾ ਉਨ੍ਹਾਂ ਨਾਲ ਹੈਵਾਨੀਅਤ ਕੋਈ?
ਓਹ ਤਾਕ਼ਤ ਦੇ ਨਸ਼ੇ ਵਿੱਚ
ਇੰਨਾ ਮਦਹੋਸ਼ ਕਿਉਂ ਹੈ?
ਜੁਰਮ ਕਿੱਤਾ ਓਸ ਨੇ ਫ਼ੇਰ ਮੇਰਾ ਦੋਸ਼ ਕਿਉਂ ਹੈ?

ਕਿਸ ਡਰ ‘ਚ ਹੈ ਸਮਾਜ ਸਾਰਾ
ਬੇਖ਼ੌਫ਼ ਓਹ ਲਲਕਾਰਦਾ ਏ
ਸੂਈ ਖ਼ੌਫ਼ ਦੀ ਨਾਲ ਸੀਤੀ ਹੈ ਜ਼ੁਬਾਨ ਮੇਰੀ
ਫੇਰ ਵੀ ਮੇਰੇ ‘ਤੇ ਹੀ ਰੋਸ਼ ਕਿਉਂ ਹੈ?
ਜੁਰਮ ਕੀਤਾ ਓਸ ਨੇ ਫੇਰ ਮੇਰਾ ਦੋਸ਼ ਕਿਉਂ ਹੈ?

ਮੇਰੇ ਕੋਲ ਨਹੀਂ ਕੁਝ ਕਹਿਣ ਦੇ ਲਈ
ਚੀਖ਼ਾਂ ਮਾਰਦੀ ਮੇਰੀ ਜ਼ਮੀਰ
ਚੀਥੜੇ-ਚੀਥੜੇ ਹੋਇਆ ਮੇਰਾ ਸਰੀਰ
ਕਿੱਥੇ ਜਾਵਾਂ? ਕਿਸ ਨੂੰ ਕਰਾਂ ਪੁਕਾਰ?
ਸੁਣ ਕੇ ਮੇਰੀ ਦਾਸਤਾਂ, ਨਾਂ ਭਰੀ ਕਿਸੇ ਹੁੰਗਾਰ?
ਕਾਨੂੰਨ ਇੰਨਾ ਬੇਹੋਸ਼ ਕਿਉਂ ਹੈ?
ਜੁਰਮ ਕੀਤਾ ਓਸ ਨੇ, ਫੇਰ ਮੇਰਾ ਦੋਸ਼ ਕਿਉਂ ਹੈ??

19.3.2014