ਔਰਤ ਦਾ ਵਜੂਦ

ਇੱਕ ਆਵਾਜ਼ ਗੂੰਜਦੀ ਰਹੀ
ਕੰਨਾਂ ਵਿੱਚ ਉਮਰ ਭਰ

ਤੂੰ ਮਿਟ ਗਈ
ਤੇਰਾ ਰਿਹਾ ਸਵਾਲ ਅਧੂਰਾ
ਜ਼ਮਾਨੇ ਬਦਲਦੇ ਰਹੇ
ਸਦੀਆਂ ਫਲਦੀਆਂ ਰਹੀਆਂ
ਠਹਿਰੇ ਹੋਏ ਪਾਣੀ ਵਾਂਗ
ਥੰਮਿਆਂ ਰਿਹਾ ਤੇਰਾ ਵਜੂਦ ਸਦਰ ਭਰ
ਇੱਕ ਆਵਾਜ਼ ਗੂੰਜਦੀ ਰਹੀ ਉਮਰ ਭਰ

ਅੱਜ ਆਪਣੇ ਹੀ
ਟੁਕੜੇ ਖਿਲਾਰ ਕੇ ਬੈਠੀ ਸੀ
ਸਭਨਾ ਨੂੰ ਪਰੋਇਆ ਮਾਲਾ ਵਾਂਗ
ਨਹੀਂ ਸੋਚਿਆ ਕੌਣ ਤੋੜਦਾ ਰਿਹਾ ਤੈਨੂੰ ਉਮਰ ਭਰ

ਢਲ ਗਈ ਸ਼ਾਮ
ਸਜਦੀ ਰਹੀ ਕਿਸ ਦੇ ਲਈ
ਔਸੀਆਂ ਕੱਟੀਆਂ
ਰਾਹਾਂ ਤੱਕੀਆਂ
ਓਸ ਨੇ ਸਦਾ ਲਾਹਿਆ
ਤੇਰਾ ਚੀਰ
ਤੱਕਿਆ ਨਹੀਂ ਤੈਨੂੰ ਨਜ਼ਰ ਭਰ
ਤੂੰ ਮਿਟ ਗਈ ਤੇਰਾ ਸਵਾਲ ਰਿਹਾ ਅਧੂਰਾ ਉਮਰ ਭਰ

ਬਦੋ-ਬਦੀ ਚਲਦੇ ਨੇ ਤੇਰੇ ਕਦਮ
ਬੱਧਵਾਸ ਹਵਾ ਤੇ ਤਿੜਕੀ ਜਮੀਨ ‘ਤੇ
ਕਿਸ ਨੂੰ ਮੁੜ-ਮੁੜ ਤੱਕਦੀ ਹੈਂ
ਤੂੰ 'ਅਕਸ'
ਤੇਰਾ ‘ਕੱਲਿਆਂ ਸਫ਼ਰ
ਨਹੀਂ ਰਲਣਾ ਤੇਰੇ ਨਾਲ ਕਿਸੇ ਇਸ ਡਗਰ
ਠਹਿਰੇ ਹੋਏ ਪਾਣੀ ਵਾਂਗ ਥੰਮਿਆਂ ਰਿਹਾ ਤੇਰਾ ਵਜੂਦ
ਉਮਰ ਭਰ...


ਅਜੀਤ ਸਤਨਾਮ ਕੌਰ
ਮਾਰਚ 2014