ਧੀ ਦੀ ਵਿਦਾਈ

ਨਿਭਾਈ ਰਾਜੇ ਰਾਣਿਆਂ ਨੇ
ਅੱਜ ਮੈਂ ਵੀ ਨਿਭਾਣੀ,
ਦੁਨੀਆਦਾਰੀ ਨੀ ਧੀਏ
ਵੇਖੀਆਂ ਨਿੱਤ ਧੀਆਂ
ਚੜ੍ਹਦੀਆਂ ਡੋਲੀ
ਅੱਜ ਮੇਰੇ ਘਰ ਵੀ
ਆਈ ਵਾਰੀ ਨੀ ਧੀਏ...

ਰੋਕਿਆਂ ਨਾ ਰੁਕਣ ਹੰਝੂ ਮਾਂ ਦੇ
ਜਿੱਤ ਕੇ ਦੁਨੀਆਂ ਸਾਰੀ
ਮੈਂ ਇਹ ਬਾਜ਼ੀ ਹਾਰੀ ਨੀ ਧੀਏ....

ਤੇਰੀਆਂ ਯਾਦਾਂ, ਤੇਰੇ ਹਾਸੇ, ਤੇਰੇ ਖਿਡੌਣੇ
ਆਪਣੇ ਬਚਪਨ ਦੀ ਏਥੇ ਛੱਡ ਜਾਈਂ ਪਿਟਾਰੀ ਨੀ ਧੀਏ....

ਰਾਜ ਕਰੇਂ ਤੂੰ ਸਹੁਰੇ ਘਰ
ਪਰ ਸਦਾ ਹੀ ਰਹੇਂਗੀ
ਮੇਰੀ ਦੁਲਾਰੀ ਨੀ ਧੀਏ....

ਰੱਜ-ਰੱਜ ਮਾਣੇ ਖੁਸ਼ੀਆਂ
ਮੇਰੀ ਦੁਆ ਹੈ, ਓਥੇ ਵੀ ਬਣੇ
ਸਭ ਦੀ ਪਿਆਰੀ ਨੀ ਧੀਏ....

ਆਪਣੇ ਜਿਗਰ ਦੇ ਟੋਟੇ ਨੂੰ ਕਰਨਾ ਵਿਦਾਅ
ਨਿਭਾਣੀ ਆਹ ਰਸਮ
ਬਡ਼ੀ ਭਾਰੀ ਨੀ ਧੀਏ...

ਹੱਥ ਜੋੜ ਦਿੱਤਾ ਪੱਲਾ ਉਸ ਨੂੰ
ਅੱਜ ਤੋਂ ਆਹ ਅਮਾਨਤ ਤਿਹਾਰੀ ਨੀ ਧੀਏ....

ਅਜੀਤ ਸਤਨਾਮ ਕੌਰ
ਮਈ 2014