ਨਹੀਂ ਮਨਜੂਰ ਤਕਦੀਰ ਨੂੰ
ਤੇਰੀ ਮੁਸਕੁਰਾਹਟ ਬਣ ਜਾਵਾਂ
ਦਰਦ ਬਣ ਜੋ ਤੇਰੀ ਅੱਖ ‘ਚ ਆਇਆ,
ਕਾਸ਼, ਉਹ ਹੰਝੂ ਬਣ ਜਾਵਾਂ
ਟੁਰਿਆ ਵੀ ਨਹੀਂ ਨਾਲ ਮੇਰੇ ਤੂੰ ਸੱਜਣਾਂ
ਢੋਹ ਲਿਆ ਬੂਹਾ ਵੀ ਤੂੰ ਮੇਰੇ ਤੋਂ ਸੱਜਣਾਂ
ਤੇਰੇ ਵੇਹੜੇ ਦੇ ਹਰੇ-ਭਰੇ ਰੁੱਖ ਹੇਠ
ਮੈਂ ਕੁਝ ਦੇਰ ਹੋਰ ਬਹਿ ਜਾਵਾਂ
ਬੰਦ ਹੋਣ ਤੋਂ ਪਹਿਲਾਂ ਅੱਖਾਂ
ਨਜ਼ਰ ਭਰ ਤੈਨੂੰ ਵੇਖਾਂ
ਸਾਹ ਥੰਮ੍ਹਣ ਤੋਂ ਪਹਿਲਾਂ
ਦਿਲ ਦਾ ਹਾਲ ਕਹਿ ਜਾਵਾਂ
ਕੌਣ ਦਿਊ ਮੇਰੀ ਚਿਖ਼ਾ ਨੂੰ ਅਗਨੀ
ਇਸ ਸੱਖਣੇ ਜਹਾਨ ‘ਚ ਕਿਸ ਨੂੰ ਬੁਲਾਵਾਂ
ਮੌਤ ਵੇਲੇ ਆ ਜਾਵੀਂ ਸੱਜਣਾਂ
ਤੇਰੇ ਹੱਥੋਂ ਲਾਂਬੂ ਲਵਾਵਾਂ
ਰਹੀ ਇੱਛਾ ਜਿਉਂਦੇ ਜੀਅ
ਤੈਨੂੰ ਮਿਲ ਜਾਵਾਂ....

ਅਜੀਤ ਸਤਨਾਮ ਕੌਰ
ਅਗਸਤ 2014